孔子七十六代孫 「乒乓小王子」孔令輝

早幾日就同史友們介紹完以最快時間完成大滿貫嘅中國球員張繼科，而再之前阿史都同大家介紹咗劉國梁同埋馬龍，但就好似仲差咗個人未講，呢個人就係有「乒乓小王子」之稱嘅孔令輝喇！

孔令輝係黑龍江哈爾濱人，同時亦都號稱係孔子第七十六代孫，但佢出名嘅原因並唔係因為咁，而係同佢嘅乒乓技術有關。孔令輝自六歲開始就接觸乒乓球，喺1986年佢就進入咗黑龍江省隊，隨後就喺1988年進入國青隊、1991年仲入選埋國家隊，成個過程真係幾順利。而佢其實同劉國梁甚至係好朋友，二人被稱為「乒乓雙子星」，喺國家隊訓練嘅時候直頭係同住一宿，呢兩位神級球手後來亦都為國家隊爭取到唔少榮譽。

有睇開孔令輝打波嘅史友可能都知道，佢係以右手橫握球拍，並且通過快攻打法兩邊拉拉弧圈而達到穩中求勝。由於孔令輝整體技術相當全面，所以喺歷年嚟嘅世界乒乓球賽、世界盃以及奧運會佢都可以拎到冠軍，成為「大滿貫」得主，真係犀利！