靖國神社供奉住過千名二戰戰犯？

尋日就同史友們介紹點解內地男明星拜訪乃木神社會引起國民憤怒，但其實佢拜訪嘅神社唔止得一座，仲有著名嘅靖國神社！

靖國神社引起中日兩國爭議其實就唔係一朝一夕嘅事，但到底呢件事係由幾時開始呢？阿史今次就同大家介紹一下啦！靖國神社本身係明治天皇建立嘅眾多招魂社之一，建社最初只為供奉明治維新以嚟為日本戰死嘅軍人，而呢間神社亦都係日本天皇唯一鞠躬對象。就咁聽落好似冇乜問題，但如果當中供奉嘅係危害世界嘅戰犯呢？

去到第二次世界大戰之前，呢個係國家神道象徵嘅神社就由日本軍方接管，由於呢個地方被視為係軍國主義嘅象徵，日本戰敗之後甚至差啲畀盟軍佔領當局廢除，神社要改組為宗教法人先得以保留。而去到1978年之後，靖國神社宮司松平永芳就將14位遠東國際軍事法庭判決甲級戰犯加入到靖國神社合祭；而且仲有1068名被定罪嘅加入到戰犯靖國神社名冊當中，呢個舉動令到日本昭和天皇極度不滿，甚至自此以後都再冇參拜過神社。