塔利班重掌阿富汗政權，唔少人都話美國响阿富汗打咗差唔多二十年仗終於頂唔住，情況同八十年代蘇聯有啲似，阿富汗呢個「帝國墳場」之名睇嚟唔講得笑。

可能史友們都知道，蘇聯响上世紀七十年代末揮軍入侵阿富汗，結果呢場阿富汗戰爭打足十年，仲要係以蘇聯失敗告終。1973年阿富汗廢除君主制後，成立共和國。後嚟人民民主黨响1978年發動軍事政變，推翻原來烏德汗政權，成立社會主義政權，蘇聯成功响阿富汗國內扶植親蘇政權。不過，响1979年，部長會議主席哈菲佐拉．阿明發動政變，成功掌權。佢上台後就聲稱要改善同美國關係，好快蘇聯就決定要剷除哈菲佐拉．阿明。蘇聯殺死咗哈菲佐拉．阿明之後，阿富汗陷入一片混亂，反政府武裝力量不斷攪局，最後蘇聯聲稱「應阿富汗人民民主黨和國家領導的集體請求，反擊外來侵略」為由，出兵阿富汗。

本來蘇聯軍方預估呢場阿富汗戰爭只係會打三個月，點知蘇聯軍隊陷入游擊戰之中，其中最出名就係獲美國支持嘅聖戰者。蘇聯軍隊雖然响軍備上有相對優勢，但阿富汗嘅山區地形往往令蘇軍無所適從，結果呢場仗一打打咗成十年。到咗1988年，蘇聯正式宣佈從阿富汗撤軍，呢場戰爭以蘇聯失敗而告終。

蘇聯响阿富汗戰爭期間共花費600億盧布，近萬五蘇軍戰死沙場，傷病人數近10萬。阿富汗戰爭動搖咗蘇聯國家嘅根本，成為蘇聯解體嘅原因之一。另一方面，阿富汗戰爭結束後，阿富汗仍陷入長期內戰局面當中。

原圖：wikicommon