香港電車獲健力士確認為 「最大服務中的雙層電車車隊」

搭車要畀錢係常識，但如果阿史同你講，今個星期三搭電車可以一蚊都唔使畀，唔知大家又信唔信呢？

早前香港電車公司就公布，今個星期三將會舉辦第一次由電車公司自行承擔嘅免費乘車日。咁電車公司會咁樣做其實就有兩個原因，第一個原因就係想慶賀香港運動員喺東京奧運入面拎到好成績，但另一個原因可能大家都未必聽過。原來早前香港電車就獲得健力士世界紀錄確認為「最大的服務中的雙層電車車隊」，電車公司認為呢次嘅殊榮就等同健力士對香港電車過去117年每位員工付出努力嘅一份肯定，所以就有咗呢個決定喇！

電車嘅出現真係唔係一件容易嘅事，早喺1881年港島嘅人口就不斷增加，而且工商業發展迅速，當時已經相當需要集體運輸交通工具出現。之不過早期其實大家都係建議興建鐵路而唔係電車。直到1901年，當時港府就落到決定，通過喺港島興建以電力推動嘅電車系統，最初範圍就只係由堅尼地城去到銅鑼灣，並且首批就只有26架電車，容納嘅人數唔計頭等每個車廂就只係得32至48人，所以都唔係人人可以坐到。