隨住塔利班重新掌控喀布爾，美國維持咗接近20年嘅阿富汗戰爭亦都去到尾聲，阿富汗嘅政局同埋往後嘅發展大家都仲需要時間觀察。但喺呢度就有一個問題唔少史友都提出過，就係點解美國、英國呢類超級大國喺阿富汗呢個戰場上往往都係敗走嘅一方？咁就要由阿富汗「帝國墳場」嘅稱號開始講起。

阿富汗喺地理位置上嚟講就係位於南亞、中東、中亞匯合嘅地方，亦都被稱為「亞歐大陸心臟」，無論係古代定係近年都係相當重要嘅地區，喺歷史上波斯帝國、阿拉伯帝國、蒙古人都嘗試佔領呢個地方；而嚟到近代就有英國、前蘇聯同埋美國都紛紛涉足阿富汗呢個地區。雖然阿富汗係唔少大國覬覦嘅對象，但就算喺科技同埋資源差距極大嘅情況下，阿富汗都仍然可以令到呢啲大國敗走！

阿富汗有「帝國墳場」呢個稱號一啲都唔誇張，單係講19至20世紀三次嘅英阿戰爭、1979年至1989年蘇聯入侵同埋美國長達20年嘅戰爭，阿富汗獨特嘅地形令到當地部落民兵可以喺山區隨時發動突擊；雖然國內土地甚少森林可以隱身，但就因為有好多溶洞同埋地下井，令到部落民兵以遊擊戰作為主要戰術；更重要嘅係，由於阿富汗嘅山谷地形相當險峻，令到呢啲依賴補給線嘅大國極難進行補給。單係呢幾項地理因素，就令到阿富汗成為「帝國的墳場」，令所有入侵呢個地方嘅大國付出沉重代價。

原圖嚟自網絡