又係時候同史友們介紹世界各地嘅考古發現,今次就同大家介紹一下內地嘅考古發現。喺我國發現墓葬並唔係咩新鮮事,雙人嘅墓葬亦都唔罕見,但以下嘅呢種墓葬史友們可能都未必聽過!

阿史所講嘅呢種墓葬名為「擁抱葬」,近排考古學家就喺國際權威考古學期刊《International Journal of Osteoarchaeology》發表對北魏時期(西元386年-534年)「擁抱葬」進行全面系統嘅生物考古學研究報告。喺報告入面中外考古學者就圍繞住山西省大同市喺2020年嘅發現展開討論。

據介紹呢個墓葬本身就係一座同穴單棺合葬墓,喺發現嘅時候男墓主嘅身體係向左側傾,面向左側並且以右手搭喺女墓主腰部將女性墓主環抱;至於女性墓主就身朝右側男性墓主,頭部枕喺男性墓主嘅肩部。就咁睇個畫面相信大家都感受到兩位墓主緊密擁抱、姿態自然。

其實「擁抱葬」呢種葬法喺世界各地已經有六千幾年歷史,而喺中國嚟講就得北魏時期有比較多發現,而要有咁完整嘅保存落嚟真係相當難得!

原圖嚟自網絡