史友們以前讀中史個陣可能都知道,民國時期曾經出現過一種短命貨幣。呢種貨幣由1948年8月開始發行,到1949年7月停止流通。無錯!就係金圓券。

金圓券嘅出現好簡單,就係國民政府搞唔掂個經濟下嘅政策。1945年抗戰結束後,無幾耐就爆發國共內戰,國家生產力未恢復又要打仗,經濟每況愈下,所以國民政府就通過印銀紙解決經濟問題,包括應付軍用開支。據資料所載,當時法幣嘅發行面額總值,由1945年嘅5569億元上升至1948年8月604兆元。

咁多銀紙流通自然搞到通貨膨脹,錢唔值錢。咁點算呢?响1948年8月19日,即73年前嘅今日,中國國民黨召開中央政治會議,通過幣制改革方案,發行金圓券,同時停止發行法幣。呢段橋係由當時上任幾個月財政部長嘅王雲五諗出嚟,國民政府推出新政策後,仲以行政手段強迫百姓以黃金、外幣兌換金圓券。不過,國民政府都係搞唔掂財政赤字,於是又濫發金圓券,百姓手上嘅金圓券因大幅貶值,同廢紙無乜分別,唔少商家銀行家損失慘重,對國民政府徹底失望。社會物價暴漲,百姓唔再信貨幣,甚至選擇以物易物。到咗1949年7月,金圓券停止流通,改以銀圓券取代,金圓券隨即走入歷史,自發行到流通僅短短唔到11個月。

原圖嚟自網絡