「台灣電影之父」李行導演病逝

被稱為「台灣電影之父」嘅李行導演喺8月19日因心肺衰竭病逝，享壽91歲。提起呢位影壇傳奇人物，相信唔少史友都知道佢曾經三次拎過金馬獎最佳導演、佢嘅作品甚至七次獲得金馬獎最佳影片，對現代電影嚟講，佢真係一個舉足輕重嘅人物。

李行導演出生喺上海，喺求學時期因為接觸到曹禺嘅戲劇同埋當時流行嘅影片《小城之春》、《八千里路雲和月》和《一江春水向東流》而對電影產生濃厚興趣。而喺1948年，佢就同家人移居台北，喺台灣師範學院讀書期間就已經經常參加戲劇同埋演員工作。

咁佢係幾時踏上導演之路呢？原來係喺1957年，當年佢就已經正式做到副導演，由50年代去到80年代間，佢就以導演身份拍咗50幾部電影，就好似有《養鴨人家》、《汪洋中的一條船》、《早安台北》、《心有千千結》等，好多作品都係轟動一時。而提到呢位導演做嘅事，原來佢仲被稱為「兩岸影人交流第一人」，佢早喺1990年就率領過電影代表團去過北京，令到當時隔絕超過四十年嘅兩岸電影人重新交流；佢甚至仲喺2009年開始成立兩岸電影交流委員會，創辦「兩岸電影展」，真係意義重大！