早兩日就同史友們介紹到華人建築傳奇貝聿銘喺蘇州嘅祖宅雖然無房無廁，但最後就以過千萬嘅價錢賣出，呢位建築界傳奇嘅貝氏家族喺全國甚至有成過千套房產，真係誇張！提到貝聿銘呢個名，阿史當然就要同大家介紹下佢到底有幾傳奇啦！

之前都同大家講過，貝聿銘係蘇州望族之後，出生喺廣東省番禺縣，佢將一生都投入到建築設計上，直到八十歲都仍然創作緊，咁佢到底一生點解會同建築結緣呢？貝聿銘嘅父親係中國銀行創始人之一貝祖貽，由於工作關係，貝聿銘一家就多次隨父親移居鄉，先後喺廣州、香港、上海居住同讀書，佢就係喺聖約翰大學附屬中學畢業。

提到佢點解會同建築結緣，就要由佢祖父嘅一個要求講起。由於佢祖父貝理泰想經常見到個孫，所以要求佢每年都要返到蘇州，貝聿銘就經常返到佢叔父1917年購買嘅獅子林，喺呢段住喺蘇州園林嘅經歷入面，貝聿銘就得出「人與自然共存」嘅設計哲學。

時間去到民國二十四年（1935年），貝聿銘就去到美國先後喺賓州大學、麻省理工學院、哈佛大學攻讀建築學，並且喺當地加入齊氏威奈公司（Webb and Knapp），單係喺呢間公司就先後設計過66件設計案。而佢一生亦都有唔少經典作品就好似香山飯店常春廳、紐約阿孟科IBM公司入口大廳、香港中銀大廈中庭、巴黎羅浮宮玻璃金字塔等等，都一一應用咗貝聿銘名言「讓光線來作設計」。貝氏一生投入於建築設計，直到八十歲仍然創作，難怪佢會被稱為「現代主義建築的最後大師」。

原圖嚟自網絡