東京殘奧即將喺月底舉行，今年全港市民上下一心都支持香港嘅運動員，代表香港參加殘奧嘅同樣都係香港運動員，阿史就當然要同大家介紹下啦！繼上次介紹過余翠怡之後，阿史今次就想介紹下同樣代表香港參加五次殘奧嘅代表，香港滾球一哥梁育榮。

現年36歲嘅梁育榮，今年已經係第五次代表香港參加殘奧，喺過去四屆參賽佢就拎到三金一銀嘅成績，真係相當優秀。提到佢點解成為硬地滾球代表，原來佢喺細個果陣就不幸患上先天性多發性關節彎曲而需要經常入到醫院，亦都係呢個時候佢開始學習硬地滾球。因為有能力玩到呢項運動，佢就更加努力練習，希望可以喺呢項運動上拎到重大突破。

而結果，梁育榮都真係願望成真，佢喺2004年第一次參加殘奧，當時就已經獲得單打同埋雙打嘅金牌，雖然喺2012年倫敦殘奧果陣失利，但由於佢太鍾意呢項運動，都仍然加強練習，直到今日都依然奮戰。

原圖嚟自網絡