之前介紹咗華人建築傳奇貝聿銘一啲生前事蹟，當然唔可以唔提佢幫中銀响香港興建中銀大廈一事。最近睇返一啲相關故事，原來當年貝聿銘接到呢個柯打係有好多特別嘅「任務」。

早响1980年，中國銀行已經有响香港興建新中銀大廈嘅打算，於是就請到當時已經係國際知名建築師參與設計。响卜世紀八十年代展開呢個工作，原來背後仲有好多嘢要計算在內。八十年代中期香港前途問題完滿解決，1997年中國將恢復在香港行使主權，所以個勢上中銀呢座大廈一定要具代表性。另一方面，中銀大廈籌備興建期間，由霍明朗設計嘅滙豐總行大廈亦响興建當中，滙豐總行就有78億港元建築費，新中銀大廈就只得10億港元建築費。貝聿銘要少勁多嘅成本設計出一座可以媲美滙豐大廈嘅建築物，成為一大難題。

結果，貝聿銘採用垂直的鋼桁架（Truss）呢種嶄新嘅建築結構作為主結構，就係以四組三稜柱作主要承重點，放棄普遍使用嘅柱同樑，減少鋼材使用，控制成本之餘大廈外觀又夠晒破格同劃時代。另一方面，因為八十年代中環地區進一步放寬建築物高度限制，所以新中銀大廈响高度上就高過滙豐大廈，淨係個勢都已經贏咗。真係估唔到貝聿銘設計中銀大廈，原來背後有咁多嘢要諗。

中銀大廈從興建到落成後，就令中環多咗好多風水傳說，下回再同史友們分享下。

原圖：cj.sina.com.cn