繼續同史友們介紹代表我地香港出戰東京殘奧嘅運動員，之前就同史友們介紹咗「七金劍后」余翠怡同埋硬地滾球一哥梁育榮，呢兩位運動員都係殘奧嘅「五朝元老」，而阿史今次要介紹嘅呢位就有啲唔同，事關佢係第一次代表香港出戰殘奧架！

相信可能有部分史友們都知道，其實陳浩源喺輪椅羽毛球嘅所屬組別係勁到排行世界第二，之所以佢會第一次代表香港參加殘奧，全因為羽毛球係今屆殘奧新增項目，所以陳浩源就成為香港首名輪椅羽毛球運動員喇！

提起呢位運動員嘅經歷，佢喺2008年嘅時候因為喺內地工作不幸遇到車禍，由於傷勢嚴重所以左腳需要切除。但佢並冇因為咁而放棄自己，反而活得更精彩。佢成為輪椅羽毛球運動員，先後代表香港參加多場國際賽事，並且曾經喺 雅加達亞殘運勇奪銀牌，而呢一次佢嘅目標就係希望可以拎第一，希望史友們都可以支持香港嘅運動員啦！

原圖嚟自網絡