近排由大台製作嘅一個關於中國全國脫貧之路嘅節目火爆全網，主持人、攝製團隊嘅艱辛再加上節目介紹到中國扶貧嘅成功，感動唔少網民，甚至令到呢個節目獲得一致好評。呢個節目第一集就介紹咗位於四川省涼山州又被稱為「懸崖村」嘅阿土列爾村，今次阿史就為大家介紹下呢條村嘅故事。

本身全國唔少國民都未必知道呢條村嘅存在，事關佢所在之處係喺懸崖之上，喺呢度生活嘅村民如果要出入都需要攀爬落差達800米嘅懸崖，上落山一共就有三條路，一條路喺雨季就會水漲並且不時有岩石滾落、一條路就係喺後山繞過兩條村先落到山，但就需要七小時、而最艱險嘅一條路，就係由土路同埋17條藤梯組成，不時都會發生意外，亦都有唔少村民因為咁而失去生命。

「懸崖村」呢條路喺2016年被媒體報道後廣泛受到關注，結果縣政府就撥出一百萬為村落修築鋼梯，但原來當初係冇一間公司肯做呢宗工程，最後就由村內壯丁用咗120噸近6000枝鋼管修築成2556級鋼梯。

由危險嘅藤梯去到穩當嘅鋼梯絕對唔係容易嘅事，但中國嘅扶貧之路唔單止係咁，喺2016年開始，「懸崖村」書記帕查有格就開始徵求村民意見搬遷，政府甚至仲為願意遷到安置點嘅居民提供高達70%補貼同埋生活用品，而留低喺村落嘅村民，亦都因為政府鋪上電力系統同埋網絡而受惠，脫貧之路就係咁樣形成。

原圖嚟自網絡