中銀大廈落成引風水爭議？

上次阿史介紹已故建築大師貝聿銘當年起中銀大廈嘅一啲故事，仲提過下中銀大廈引起好多風水傳說，今次阿史就同史友們講講。

話說貝聿銘設計中銀大廈係以四組三稜柱作主要承重點，呢個破格設計就好似一把尖刀咁，正正係風水大忌。咁啱得咁橋，响中銀大廈1986年動工個年，時任港督尤德訪京途中心臟病發猝死，之後1987年又出現咗香港股災，所以話中銀大廈破壞風水之說就係由咁開始。對於相關批評，貝聿銘就將中銀大廈橫置部分嘅鋁條拎走，令鋁條睇落以鑽石形，有助聚財。另外，中銀大廈外仲種咗唔少花草樹木，又設下瀑布同大石，打造祥和氣場，有花有草有水生生不息，提升風水格局。

之不過，唔少响中環工作嘅人對中銀大廈呢個破壞風水傳說仍然在意，阿史就聽過一位投行工作朋友話，佢哋公司有一個位，窗外望到中銀大廈對維港個刀鋒尖位，之後坐呢個位嘅幾位同事接連出現健康問題，結果佢公司請咗個風水師上去，話個位唔可以坐人，因煞氣太大，只能種植物或養魚擋煞喎。