廈門海關偵破清代墓碑石頂蓋走私案

繼續同史友們介紹我國近排有關文物古蹟嘅新聞，盜墓、偷運珍貴文物嘅新聞不時都會發生，但史友們又有冇諗過連墓碑石頂蓋都有機會被走私？

近排廈門海關就聯合公安偵破咗一宗文物走私出境案，事源就係有一間南京嘅進出口公司向海關申報會出口一批「現代石雕製品」共計21件，但當關員查驗果陣就發現當中嘅貨物都有屋簷狀裝飾，仲有魚龍、葫蘆、錢幣等圖案雕刻，而且表面都帶有風化痕跡同埋泥土，絕對唔似係新嘅製成品。

基於以上嘅疑點，關員就懷疑呢批貨物極有可能係文物，貨主起初就聲稱文物係嚟自福建某村落，後來又話係喺寺廟拆遷留嚟，事件就更加可疑。而經過廈門海關緝私部門聯合地方公安，喺走私集團密謀再次走私另一批文物出境果陣，就一次過將佢哋抓獲，最終就發現呢批文物係歷經三百年風雨嘅清代墓碑石頂蓋，部分更加係清朝康熙、雍正年間，有極高嘅歷史、藝術研究價值，而呢宗案件亦都成為全國海關近年首次查獲呢類文物走私出境案。