印尼傳奇羽球手陶菲克 自爆曾被利誘輸比李宗偉？

喺世界羽壇最精彩嘅時期，就曾經有四位傳奇球手被廣大傳媒稱為「羽壇四大天王」，除咗有我哋熟悉嘅李宗偉、林丹、蓋特之外，仲有印尼傳奇陶菲克。點解阿史會冇啦啦提起佢？原來近排呢位傳奇羽球手就大爆料喎！

作為世界羽壇四大天王之一嘅印尼傳奇陶菲克（Taufik Hidayat）近日就向傳媒爆料，指自己喺參加2006年亞運果陣，就曾經有工作人員向佢開價4億印尼盾要求佢輸畀李宗偉。陶菲克就表示，自己當時聽到呢個要求之後就真係嬲到震！陶菲克喺羽毛球方面嘅實力真係不容置疑，佢曾經喺2004年雅典奧運摘金、2005年世錦賽奪金，2006年多哈亞運同樣拎到金牌，係印尼第一位拎到大滿貫嘅男單球員。

咁佢喺聽到呢個要求之後，佢就表示呢種行為同賣國冇分別，佢毅然拒絕，並且喺2006年多哈亞運先係擊敗李宗偉，繼而仲打敗埋林丹摘金，以行動回應收買佢嘅人。