近代中國第一所西醫院——博濟醫院

可能因為疫情嘅關係令到大家兩年幾冇得去旅行，所以網絡都流傳好多地區名勝嘅相片，畀大家望梅止渴，而阿史近排就睇到一輯「博濟醫院」嘅舊相。

廣州「博濟醫院」依家已經係「中山大學孫逸仙紀念醫院」，呢個地方唔單止係我國西醫發源地，仲係孫中山學醫嘅地方。喺1835年，美國傳教士伯駕醫生就得到十三行首富伍氏家族10萬兩白銀嘅幫忙，喺廣州新豆欄豐泰行3號開設西醫眼科「新豆欄醫局」，後來受到鴉片戰爭影響而停業。去到1842年，醫局就重新後業並且改建成綜合性嘅西醫院，成為中國第一所西醫院。

而去到18世紀50年代，第二次鴉片戰爭又爆發，醫局直頭就毀於戰火當中，伯駕早喺戰前就將醫局交畀嘉約翰主掌，嘉約翰就只好喺南關增沙街租一華人住宅改裝為醫局。捱到戰爭結束後，醫局就喺1859年5月重新開業，正式定名為博濟（Pok Tsai）醫局並且喺1866年遷到仁濟大街現址，定名博濟醫院。