形容人大洗、每日都將啲錢用晒，可能有史友會即時諗到「周日清」呢個名，之但係「周日清」並唔係單單用嚟形容呢種舉動，佢有可能係一個歷史人物，甚至仲係「乾隆皇契仔」！

「周日清」到底係咩人呢？原來有關呢個人嘅記載並唔係喺史書出現先，而係喺清末小說《萬年青》入面出現過。據小說入面講到，喺乾隆皇帝南巡江南期間，佢就喺途中認識到周日清呢個人，本身只係平凡人家嘅周日清當然就唔知道乾隆嘅身份係皇帝，只係覺得佢係一個十分豪爽嘅達官貴人。而當佢哋兩人相聚嘅時候，周日清都總係會用晒乾隆皇帝啲錢，同佢嘅名相當配合。

當世人知道周日清做出呢種行為而乾隆皇帝都相當容忍嘅時候，於是就以「乾隆皇契仔」形容佢，甚至坊間仲有傳佢就係乾隆帝私生子。之不過到底歷史上係咪真係有呢個人呢，就真係無從稽考喇！

原圖嚟自網絡