繼續同史友們介紹返郭永懷嘅生平故事，尋日就講到呢位被譽為「抵得上十個師」嘅「兩彈一星」元勳科學家喺返到中國之後努力為建設祖國而出力，細心嘅史友可能都會留意到，其實郭永懷係23名「兩彈一星」元勳科學家中唯一烈士，到底點解呢？

郭永懷喺1956年放棄咗喺美國十幾年嘅學術研究，毅然返到中國貢獻，而當時佢返到北京嘅時候毛澤東、周恩來都親自接見佢，而當時佢只係表示想盡快投入工作。冇幾耐，郭永懷就去到錢學森擔任所長嘅力學研究所工作，後來仲臨危受命進行原子彈理論探索。為咗加快進行研究，佢甚至同研究團隊一齊去到青海核武器研製基地，居住喺惡劣嘅環境之內都毫無怨言。

喺1964年10月16日，喺郭永懷同埋一眾科學家努力之下，中國第一粒原子彈終於成功試驗，中國亦都成為全世界第五個擁有核武嘅國家。之不過，喺1968年，郭永懷因為發現到一項核武器嘅重要線索，喺由青海試驗基地搭夜航飛機返到北京途中，不幸失控墜毀爆炸起火，全機14人有13當場慘死。當救援人員趕到現場之後，喺飛機入面搵到嘅就已經係郭永懷同其他警衛員抱埋一齊燒焦嘅遺體，而喺佢哋身體當中，就係一個完好無缺裝有中國核武數據資料嘅公文包。

臨死前嘅一刻，郭永懷同埋一眾警衛員仍然係為國家著想，情操真係相當偉大。

原圖嚟自網絡