早前就同史友們介紹到17世紀荷蘭黃金時代畫家約翰尼斯・維梅爾（Johannes Vermeer）嘅十幾幅同女性相關嘅作品當中，有一幅《窗邊讀信的少女》（Girl Reading a Letter at an Open Window）歷年嚟都被認為係有隱藏到神秘書像，而近日呢幅作品真係完成咗修復喇！

呢幅繪於1657-1659年間嘅《窗邊讀信的少女》，描繪咗一個少女獨自喺窗戶睇信，整幅作品表現出安詳平靜嘅氣氛，係維梅爾晚期嘅作品。正當大家以為呢幅作品淨係咁樣嘅時候，喺1978年機緣巧合嘅一次X光掃瞄嘅情況下，廣大嘅藝術家就發現作品嘅右上角牆壁原來唔係空蕩蕩，而係繪有天使邱比特。

喺X光之下，畫作上嘅天使邱比特係右手持弓箭，左手高舉，只係成個形象被顏料覆蓋咗。其實睇返維梅爾其他室內畫作，都唔難發現佢嘅作品不時都會有愛情嘅主題，而呢次嘅發現學界都相信係維梅爾所為，推測佢係因為唔滿意畫作先至咁做。

雖然喺上世紀七十年代就已經有呢個發現，但歷年嚟都冇人嘗試清走表面嘅顏料，直到2017年先至為畫作進行維護保護，並且由畫廊修復人員以19世紀清潔劑配方將表層灰塵污垢清除，再通過化驗邱比特位置顏料同埋畫中顏料性質，先至可以將呢層隔咗幾十年先至加上去嘅顏料清除，畫中畫就係咁樣喇！

原圖嚟自網絡