八大漁港在香港？

以往讀書個陣成日都講，話香港以往係一個小漁港小漁村，後嚟成為中外貿易中心，發展至今已經係國際大都市。對於香港係漁港呢個講法某程度上都係正確，不過昔日香港嘅漁港其實係分散响唔同嘅地方。

响以往，有一個講法就話香港有「八大漁港」，當中就包括香港仔、筲箕灣、大澳、長洲、青山灣、大埔、沙頭角以及西貢市。呢啲漁港都係人口集中嘅避風港，亦因為有避風地方，成為漁船聚集點，同漁業相關嘅生意好似造船、補給、販魚呢啲商戶都响避風塘附近出現，慢慢形成一個漁港同小市鎮。而响呢啲漁港當中，通常都會有唔少廟宇，最常見就係天后廟同洪聖爺廟。其實，除咗上述八大漁港外，香港仲有好多小漁村，規模啲漁港咁大，人口無咁多，散落响香港唔同地方。

時至今日，香港漁業開始式微，阿史就聽過一位老漁民講，話依家無乜後生仔入行，四十歲開船打漁已經係算係好後生，而且都係子承父業。不過，阿史又聽一位業界代表講，香港漁業已經轉營咗好耐，唔少養殖戶以科學化方式養漁然後拎去賣。