欣賞華麗嘅畫作必須係要用到眼睛，但假如係視力障礙人士想欣賞畫作而佢哋又睇唔到野，咁到底有咩方法可以幫到佢哋呢？近排，荷蘭一間博物館就破天荒為佢哋諗到一個方法。

位於荷蘭嘅烏得勒支中央博物館（Utrecht Central Museum）近排就舉行咗一個名為「盲點」（The Blind Spot）嘅展覽，當中就以實物還原返知名畫作描繪嘅場景。咁問題嚟喇，就算還原返個場景，視障人士其實都冇辦法可以睇到架。其實巧妙嘅地方就係喺度，因為失去視力，視障人士變相其他感官就變得更敏銳，所以佢哋係可以通過觸摸「畫作」、以耳機聆聽場景甚至仲用埋氣味去認識每一幅畫作。於是，喺呢次展覽入面，就有荷蘭畫家范・戴克（Floris Claesz Van Dijck）名作《靜物和水果、乾果及乳酪》（1610），以餐桌、水果及乳酪等實物構成，視障人士最先並唔係「睇到」幅畫，而係「聞到」幅畫，呢個諗法真係有意思！

原圖嚟自網絡