近日網上流傳一段片段,有一位女士搭巴士個陣因落唔切車而狂鬧巴士司機,高音加上連珠粗口再加發忟憎個下,俾廣大網民笑佢公主病發。可能呢位姐姐仔一時情急情緒失控,但其實响行車時騷擾巴士司機係屬犯法行為,而且騷擾巴士司機後果仲可大可小。

2018年10月,重慶市就發生過一宗因騷擾巴士司機而引致嘅致命車禍。當時一架巴士去到萬州長江二橋時,突然失控衝破防撞欄直墮橋下嘅長江江面,事故釀成15人死亡。呢宗慘劇發生原因,係因為一名女乘客因錯過落車地點,要求司機停車但被拒,之後就同司機發生爭執,鬧鬧下仲打司機個頭,之後司機還手,就咁架車就失控墮江。

提一提各位史友,根據《公共巴士服務規例》第230A章13A條,任何人唔可以故意阻礙或妨礙巴士司機,或故意分散佢哋注意力,違者即屬犯罪,可處罰款5000港元同監禁6個月。