今時今日想如果想放開懷抱咁食海鮮，對荷包嚟講都有一定程度嘅損傷，但唔知史友們又有冇想像過，其實喺古羅馬沿海嘅居民，佢哋主要嘅食物唔單止係海鮮，攝取量竟然仲多到呢個程度？

近排就有研究人員對因為公元79年意大利維蘇威火山爆發而被摧毀嘅赫庫蘭尼姆古城進行考古工作，喺火山灰封存之下，唔少城市建築物以及人類遺骸都保存得相當完整。由英國約克大學領導嘅研究團隊就對當中嘅人類遺骸進行調查，結果就發現當地嘅居民海鮮攝取量，竟然係現代意大利人嘅三倍以上，而男性食嘅海鮮甚至比女性仲要再多啲。

咁到底研究人員係點樣發現呢點呢？原來研究人員就分析咗當中17具成人遺骸，透過研究胺基酸入面嘅碳得出赫庫蘭尼姆居民海鮮攝取量係同地區現代人嘅三倍，而男性仲比女性多出50%，換言之真係餐餐都食海鮮咁濟，真係令人羨慕！

原圖嚟自網絡