最近南亞國家阿富汗成為全球焦點,近日唔知做乜美國個邊有本雜誌就出咗篇文章,提及响千幾年前中國嘅唐王朝入侵過依家嘅阿富汗地區。果然唔少內地網民都覺得好好笑,《環球時報》發文好串咁話:咁嚟自沖繩嘅新垣結衣都係中國人啦!

咁呢段歷史又係點嘅呢?大概响隋唐時期,响中亞地區出現一個國家叫西突厥汗國,呢個汗國原本係突厥汗國一部分,後嚟分裂為東突厥汗國同西突厥汗國,而西突厥汗國國土就包括咗現今阿富汗北部地區。响唐初時唐軍滅咗東突厥汗國後,下一個目標就係控制絲綢之路中亞地區嘅西突厥汗國。响唐高宗時期,唐軍三次出兵西突厥,招降咗好多西突厥部落,最後滅亡西突厥汗國。後嚟就响西域各地置都督府,隸屬安西大都護府及後嚟嘅北庭都護府,而部分都督府所在位置同控制範圍就係响現今阿富汗北部地區。至於部分內地網民認為唐廷唔係「入侵」,係因為唐廷對唔少部落都係以羈縻政策經籠絡而得以控制。

咁唔知史友們又有無特別睇法呢?