梁思成林徽因發現千年唐代建築

之前阿史講過四川峨眉山光明寺正殿同日本奈良東大寺嘅大佛殿「好似樣」，引起唐代建築傳承呢個討論。其實响中國境內，唐代原構建築風格嘅建築物係有嘅，其中就以山西佛光寺最為著名。而呢個千年佛寺，仲同著名建築師梁思成同林徽因有關。

山西五台山佛光寺係中國現存第三古老嘅木結構建築，正殿東大殿係現存內地規模最大嘅唐代古建築，建於唐大中十一年，即公元857年，據資料所載佛光寺大殿曾進行過十六次修繕。至於佛光寺能為世人所知，就全因梁思成同林徽因响三十年代去山西考察。當年梁思成同一班建築大師成立中國營造學社之後，就走咗十幾個省，勘查咗過千座古建築遺跡，梁思成其中一個盼望，就係搵到仲存在嘅唐構建築。結果，佢哋喺1937年就响山西嘅佛光寺圓咗呢個心願。梁思成依據東大殿嘅唐代木結構、唐代彩畫壁畫、唐代彩塑、唐代墨跡，再加上碑刻等文獻史料，最終確證東大殿為唐代建築。

其實响梁氏夫婦確定佛光寺係唐代遺留落嚟嘅古建築前，部分日本建築學家就話中國同朝鮮半島境內已經再無唐構木建築，但日本就保留住。所以梁思成等人嘅發現絕對係對中國建築歷史一個重大發現，梁思成生前話過佛光寺東大殿係「中國第一國寶」。