為逃避戰亂避難，唔少有條件嘅家庭都會喺自己居所附近興建地下室又或者秘道，之不過如果阿史同大家講有個避難所足足可以容納成千人，唔知大家又信唔信呢？

近排喺四川南充市南部縣就發現咗一間隱蔽人造石屋，專家就認為呢所石屋並唔係現代建築，反而係一座有返咁上下歷史嘅軍事遺址。呢間石屋所在嘅位置就係南部縣楠木鎮白鶴村嘅一個石頭山上。據研究調查得出結果，呢間石屋就係兩個附近姓蒲富戶喺清朝咸豐年間為咗逃避戰亂而改建，石屋由族人募捐開挖，每逢發生戰亂，族人都會集體搬入石屋躲避。

石屋建設嘅位置並唔高，但勝在極具隱蔽，有唔少岩石同埋樹林喺附近，外人就咁行過都未必可以發現到石屋。要入到石屋唯一一條路就係上山嘅棧道，棧道呈狹長梯步狀，石屋原本只係一座石頭山，但後來經過挖空改造成一座「堡壘」，分成四層由客廳、臥室、廚房、廁所、倉庫應有盡有，總面積仲達到400平方米，真係長住都冇問題啊！

原圖嚟自網絡