要自發進行考古、再喺呢個過程當中發現到文物,真係唔係一件容易嘅事,之不過喺日本就有一名熱愛考古嘅上班族,喺一次機緣巧合之下發現到一舊化石。

呢位上班族喺舊年11月就喺鹿兒島縣獅子島搵到一舊睇落就係普通石仔,但實情就係化石。經過東京都市大學考古團隊考證之下,終於就喺近日證實到呢位上班族所發現嘅石仔唔單止係翼龍化石咁簡單,更加係當地第一次發現嘅翼龍,所以呢個品種嘅翼龍亦都以當地古稱薩摩命名。

據日媒報道,呢舊化石長約7厘米,寬2厘米,呈橢圓形,就算睇到都未必會知佢就係化石。而經過專家比對過去其他研究例子之後,就相信化石屬於翼龍翅膀或腳骨嘅一部分。據估計,呢種翼龍應該生存喺一億年前白堊紀,以捕食魚類為生。

呢件事嘅焦點除咗喺化石之上,仲有唔少網民都關注呢位上班族。呢位名為宇都宮聰嘅男子現年51歲,係一位電器公司職員,業餘果陣都會同東京都市大學考古團隊四出探索,而經過呢件事,佢就被稱為「上班族化石獵人」,真係幾得意嘅外號。

原圖嚟自網絡