近排香港大學就同深圳市政府簽署合作備忘錄，港大將會喺深圳設立港大校園，校長張翔日前接受內地傳媒訪問就表示，喺深圳港大校園設立之後，可以利用「一校兩區」發揮國際化優勢。而喺成段訪問當中，佢就強調咗一點，就係「港大為中國而立」，阿史今次就同大家講一講。
點解張翔校長會有呢個講法呢？香港大學早喺1911年成立，當時仍然係清政府統治嘅時間，只係去到1912年果陣滿清先被推翻。如果史友們讀過呢段歷史，應該都會知道「港大為中國而立」係時任港督盧吉喺創辦港大果陣嘅意思。早年設立港大，其中一個目的就係為咗可以鞏固英國在華嘅影響力，並且希望可以引嚟更多內地莘莘學子嚟到香港求學，所以喺課程設計上當年係相當切合中國需要，例如唔少課程重點都放咗喺醫科、工程等等嘅科目上。
而當年盧吉呢個諗法其實都得到唔少華商華僑熱烈響應，兩廣總督張人駿甚至仲為呢個計劃籌款。而去到民國初年，北洋政府其至每年都有派直隸省嘅學生入讀港大，為中國科學、文學、工程作出重大貢獻。所以，港大係確確實實為咗中國而立。
原圖嚟自網絡