呢排香港新冠肺炎疫情好似緩和咗好多,但响外國確診數字仍然高企。有美國傳媒報道話,預計兩周內美國因新冠肺炎死亡人數將會超過1918年因大規模流感死亡人數。嘩!真係得人驚!

1918年流感大流行係二十世紀其中一次嚴重疫情。當時响歐洲就有好多國家出現流行性感冒疫情,而當時西班牙因呢個疫情出現而被傳媒廣泛報道,因此呢個病亦被稱為「西班牙流感」。但後嚟專家發現呢個疫情早响1918年前已經响法國、德國等歐洲國家出現,但當時仲係响一戰期間所以消息封鎖咗,只係得西班牙有相關報道。而呢次疫情好快就擴散至全球多個地區,當時世界約四分之一人口即五億人左右都染病,死亡人數保守估計至少過千萬人。講返美國,當年流感大流行就死咗67萬人,單係1918年10月就死咗成20萬人。依家美國個邊統計話新冠肺炎死亡人數已經達到66萬,所以先話新冠肺炎疫情死亡人數會勁過1918年流感大流行。

原圖:cyol.net