昂坪纜車可能唔少史友都曾經乘搭過，唔知史友們喺纜車之上又會唔會諗到一個問題，就係纜車所在之處係喺崎嶇嘅山林之中，到底興建纜車所需嘅沉重建材係點樣運入去嘅呢？答案就係靠騾喇！

日前嘉道理農場暨植物園就發佈咗一則「訃聞」，當中就提到農場內雌騾Duffi不敵嚴重感染過身。提起呢個名大家可能未必知Duffi嘅身世，但其實喺2004年港鐵公司興建昂坪纜車果陣，就因為大嶼山山勢陡峭並且冇現成路徑，但由於要喺呢個山勢險惡嘅地方興建六個站，所以最後就決定仿傚加拿大洛磯山脈以騾仔運物資上山嘅方式，由加拿大引進6隻最大體形騾仔代替人力搬運鋼鐵、英泥同埋工具等等。

Duffi就係呢六隻騾仔其中之一，曾經同建築工人、工程師一齊「朝九晚五」，一直工作到2005年。喺整個運輸任務完結之後，六隻騾仔中入面四隻被送返加拿大原生地，Duffi同埋雄性伴侶Dennie就加入嘉道理農場暨植物園動物保育部，成為可持續發展大使。

原圖嚟自網絡