關於史前人類嘅生活,就算科技幾咁發達都好,仍然有唔少謎團尚待解開,其中一個就係佢哋到底幾時開始識得「著衫」!

近日德國人類歷史學家Emily Yuko Hallett就有一啲新發現!佢帶領嘅團體早喺2012年開始就喺摩洛哥大西洋海岸「走私者洞穴」(Contrebandiers Cave)研究早期人類殘骸,而近日佢就通過研究發現一啲古老嘅骨頭。如果呢啲骨頭係食物殘渣都相當合理,但奇就奇在呢啲骨頭係經過加工,並且唔係用於狩獵,反而係用於加工皮革同埋毛皮。考古團體一共就發現62件骨製工具,當中就有經過平滑拋光嘅肋骨刮刀、割刀同埋鏟子,同時亦都有沙狐、胡狼、野貓等動物遺骸。

種種證據就表明,其實12萬年前嘅原始人就已經識得將動物嘅毛皮剝去,而且應用嘅技術同現今並冇好大分別!咁到底具體呢班原始人嘅衣物又係點樣,因乜事令佢哋學識製衣?呢啲謎團尚待考古學家解答!

原圖嚟自網絡