南京大屠殺倖存者黃劉氏去世

喺日本侵華期間發生過唔少泯滅人性嘅人類罪行，而南京大屠殺就係日軍佔領南京之後對當地居民所進行嘅有組織、有預謀、有計劃嘅大規模屠殺以及反人類嘅戰爭罪行。見證呢段悲慘歷史嘅倖存者本來已經所餘無幾，而據侵華日軍南京大屠殺遇難同胞紀念館官方微博表示，大屠殺倖存者之一黃劉氏喺星期日凌晨去世，享年96歲。

根據目前南京侵華日軍受害者援助協會登記在冊在世嘅倖存者已經只係得返63人，黃劉氏其實生前接受過唔少媒體訪問，佢憶述返喺1937年冬天嘅時候，當時日軍攻打南京佢就同父母一齊逃走到江北。當時一家三口就帶住全部家當渡江，佢就親眼目睹江上嘅船家、老百姓都被日軍用槍掃射打死。佢當時就表示「那時候我打扮得不像個人樣，戴個草帽，臉上抹著黑灰。我們還親眼目睹一個撐船的女船家被日軍打死了」，呢段就係黃劉氏留低嘅證言。

好彩嘅係黃劉氏一家人去到江北之後就得到好心人收留，直到翌年3月先返到南京。見證呢件戰爭罪行嘅人愈來愈少，每一個離去嘅人都係提醒緊大家要銘記歷史、不忘過去、珍愛和平。