今日係中秋佳節嘅日子,相信唔使阿史同大家講,大家都會知道今日係一家人團圓、食月餅、玩燈籠、賞下月嘅日子。講起呢個傳統節日,史友們都會知道應該要做啲乜,但如果講到今日嘅禁忌,唔知大家又知幾多呢?
喺傳統上而言,中秋節實際就係一個拜月嘅日子,喺今日有好多人都會準備金紙、鮮花素果、圓形月餅參拜太陰星君祈求長壽、青春永駐、桃花姻緣等,但原來唔係人人都拜得架!就簡單直接嚟講就係「男不拜月」,事關男性屬陽,同屬陰月亮唔配合,所以拜月只有女性可以參與。
其次就係特別喺中秋節呢一日,大家髮型上亦都要相當注意,就好似瀏海千祈唔好遮住額頭,因為額頭係「神燈」所在,今日就最好放出嚟招下好運!大家都知中秋係團圓嘅日子,所以其中一個禁忌就係唔好批啲唔圓形、飽滿嘅餅同埋水果出嚟,因為古人都深信,只有圓形先有吉祥寓意,唔知史友們又會唔會跟住做呢?
原圖嚟自網絡