戴卓爾夫人訪華 設宴菜式爭拗不停?

尋日就同史友們分享咗戴卓爾夫人訪華果陣同鄧小平嘅對話，雖然戴卓爾夫人喺訪華開初態度相當強硬，但最後都需要同中方達成協議。呢場訪華之旅就算過咗咁多年都仍然受到唔少討論，而據劍橋大學公開過嘅檔案就發現，原來喺行程開始之前戴卓爾夫人單單係喺設宴菜式上就已經有過唔少爭拗。

有「鐵娘子」之稱嘅戴卓爾夫人，作為第一位到訪北京嘅英國首相，同時又要就香港前途問題進行談判，自然係備受國際關注，所以唔少細節都需要注意，特別係飲食方面。當年英國方面為咗建立形象，係決定喺人民大會堂設宴回請中方領導，咁到底呢餐飯又有咩菜式呢？

呢一個正正就係巧妙之處喇！當年戴卓爾夫人並唔希望畀民眾有「大花筒」嘅形象，所以決定一切都從簡，但係假如太過「簡」又會失禮國家形象，所以喺唔少細節戴卓爾夫人都提出好多意見。例如拒絕晚宴每位要價75元人民幣嘅建議，反而挑選咗一份50元人民幣一位嘅餐單；最初戴卓爾夫人係決定喺宴會上既唔要有海參魚翅，就連甜品、麵包、牛油都冇得出現，只係有蘇格蘭煙三文魚同埋水果沙律，但後來經過英國駐北京大使柯利達建議之後，都係加返海參、魚翅。