早幾日同大家介紹完上水石湖墟一啲歷史,今次阿史就想介紹下同响北區嘅粉嶺石湖墟。呢兩個墟市昔日係新界北區最興旺嘅墟市,而呢兩個墟市就係一段爭鬥嘅歷史。

上水石湖墟就响1930年成立,係由上水鄉事委員會管理,基本上係新界五大族其中四族廖氏、侯氏、鄧氏同文氏話事,當中就以廖氏為主導。亦因為咁,唔少新界非廖氏鄉民就不滿上水廖氏控制石湖墟成日呃秤,又定價不公兼自肥,後嚟粉嶺彭氏就連合沙頭角、打鼓嶺一帶鄉民自行建立一個新墟,亦即係聯和墟。

聯和墟出現之後,就成為石湖墟最大競爭對手。而响早於聯和墟成立前後,就有好多兩墟之間互鬥嘅江湖傳聞。據講當時上水人唔滿意粉嶺人起新墟,搞到聯和墟班搞手要四周圍走嚟走去開會,怕有人暗算。另一個江湖傳聞就話,當年石湖墟兩次失火,相傳同聯和墟個邊有關。至於呢啲江湖聞係咪真?就真係無人知喇!