喺唔少有關隋唐嘅影視作品當中,大家都應該會從中聽過王牌騎兵嘅名,名為「燕雲十八騎」。關於呢支騎兵相信大家歷來都有唔少疑問,例如到底佢哋係咪真係由十八人組成?又例如佢哋到底係咪真實存在?今次阿史就同大家介紹一下啦!

喺唔少影視作品當中,「燕雲十八騎」係一個相當神秘嘅存在,喺劇集當中就描述佢哋係由靖邊候羅藝所領導嘅騎兵部隊,一共由十八人組成,身穿寒衣、腰佩彎刀並且腳踏胡人馬靴、每人負箭十八枝,真係相當講究。唔單止咁,佢哋仲係以號角為令,一般只係喺大漠活動,更加嘗試消滅過侵略者幾千人,真係「神一般」嘅存在。咁影視作品當然就係混合咗民間傳說同歷史故事,咁到底「燕雲十八騎」又係咪真實存在呢?

其實喺《舊唐書》、《新唐書》入面都冇關於「燕雲十八騎」嘅記載,但喺《晉書·石勒上》入面,就有提過「懽家鄰於馬牧,與牧率魏郡汲桑往來,勒以能相馬自託於桑。嘗傭於武安臨水,為遊軍所囚……遂招集王陽、夔安、支雄、冀保、吳豫、劉膺、桃豹、逯明等八騎為群盜。後郭敖、劉徵、劉寶、張曀僕、呼延莫、郭黑略、張越、孔豚、趙鹿、支屈六等又赴之,號為十八騎。」

呢段文字既有提到後趙政權開國君主石勒曾經經建立過一支十八人騎兵團隊,而且每個人都有名有姓,就好似夔安、桃豹等人甚至喺後仔仲有埋鎮軍將軍、橫海將軍等官職。之不過,按目前史料所知,呢隊十八人騎兵團隊並冇「燕雲」兩字開頭,到只係知道佢哋嘅出生地係喺燕趙一帶。

原圖嚟自網絡