喺泥地、沙地上赤腳而行自然就會留低腳印，而呢啲好多時候都會因為腳印原來而被移平消失，但史友們又有冇諗過自己留低過嘅腳印唔單止被保留落嚟，甚至仲喺幾萬年之後變成化石畀後世研究呢？

近排美國考古學家就公布一則研究，事源就係喺2009年嘅時候動物學家布斯托斯（David Bustos）喺新墨西哥州白沙國家公園乾涸濕地河床發現到一批人類腳印化石。而根據呢批腳印，考古團隊就陸續喺公園3,200公頃範圍入面再搵到幾千個腳印化石。咁到底點解腳印都咁值得搵呢？考古學家嘅發現就話畀大家聽呢批腳印嘅價值！

經過多年嘅研究，美國地質勘探局就喺化石嘅土層入面搵到古代水生植物種子，然後再根據放射性碳定年法檢測化石年份，結果就追溯到2.1萬至2.3萬年前。呢次發現就改變咗原本認為古代人類喺約1.3萬年前由亞洲通過白令陸橋（Beringia）抵達北美洲嘅諗法，今次係有直接證據證明人類生活喺北美洲嘅時間比原本以為嘅提早一萬年，足以改寫關於美洲嘅考古歷史！

原圖嚟自網絡