黃泥涌道有個樟園遊樂場?

近排海洋公園就化身成水上樂園重新開幕，網上唔少帖文都回顧返舊時嘅海洋公園，但其實早年嘅香港除咗有海洋公園，仲有唔少有特色嘅主題公園架！阿史今次就同大家介紹下位於黃泥涌道嘅樟園遊樂場。

可能唔講真係未必有人知，其實樟園遊樂場早年係相當巴閉，事關佢係香港第一個公眾遊樂場。咁點解冇啦啦會有呢個遊樂場出現呢？原來早喺20世紀初，唔少先進嘅城市好似廣州、上海都受到歐美國家嘅文化影響，特別係喺市政同埋城市規劃方面，唔少地方都陸續出現園林式嘅遊樂場。

於是，喺1907年，華商林景洲喺跑馬地起咗座園林式別墅，據講林景洲相當好客，不時都會約友好到樟園遊玩，舉行雅集、吟詩、猜謎、下棋。喺朋友提議之下，佢就將部分土地建成遊樂場，開放埋公眾一齊玩。據講遊樂場內部就設有茶亭提供小食，仲有啲假石山同埋各式樹木畀人欣賞，但規模唔算太大。由於園內種有唔少樟樹，所以後來成個遊樂場就叫做樟園喇！