「華為」寓意「中華有為」？

經過中國政府不懈努力，喺尋日華為公司首席財務官孟晚舟就同美國司法部達成延後起訴協議，孟晚舟即時獲釋乘坐中國政府包機離開加拿大。得知呢個消息嘅國人喺全國各地都拉橫額接機，唔少民眾甚至舉橫額高叫口號「孟晚舟、巾幗英雄、歡迎回家」、「燈塔在守候」等。

見到呢一幕又一幕動人嘅畫面，國人無比團結就令阿史諗起「華為」呢個名嘅由來。眾所周知「華為」呢間公司係由任正非先生喺1987年創立，早年係以製造電話交換器為主要業務，近年唔單止為消費市場製造通信裝置，甚至從事埋建設電信網路。早喺2012年，華為就超越愛立信成為全球最大電信裝置製造商，並且喺2018年曾經超越蘋果公司，成為全球第二大智慧型手機製造商，成績真係絕對對得住國人。

「華為」呢個名實際上係相當有意思，據早年華為創始人任正非一次媒體採訪中透露，其實喺註冊公司嘅時候佢係諗唔到公司名，但當佢見到「中華有為」標語後，就覺得呢個名好有意思，於是就決心將公司叫做「華為」。而喺任正非嘅領導之下，呢間企業確實向世界展示到「中華有為」，就算受到美國「全面制裁」，「華為」依然可以屹立不倒！