華為副董事長孟晚舟，結束响加拿大長達1000日嘅拘押，獲釋翻返中國。有人就話，孟晚舟被加拿大拘押，根本就係美國打擊華為嘅手段，有人亦拎返八十年代東芝被美國制裁一事相題並論。

東芝係日本其中一間著名科技企業同電機製造商，但响上世紀八十年代就試過被美國制裁。話說當年東芝集團旗下嘅東芝機械偷偷將精密機床賣俾蘇聯。但當時尚處於冷戰時期，所以東芝機械呢個做法係違反咗對共產圈出口統制委員會的協議，以及違反日本外匯及外國貿易法。原來當時東芝機械通過瑞典廠商，將機器轉去蘇聯。

美國政府知道件事大為震怒，於是就响1987年制裁東芝，包括國防部取消原定自東芝進口150億日元嘅電腦產品合約，禁止同東芝機械簽訂任何新軍事合約；禁止東芝集團所有產品出口到美國最多五年嘅懲罰。而兩名肇事東芝高層主管被逮捕。東芝集團仲花咗1億日圓响美國大小報紙刊登「懺悔廣告」。

不過，當時有一個說法就話美國對付東芝，係因為日本係世界第二大經濟強國，東芝更响半導體高科技有相當優勢，於是美國就借題發揮制裁東芝，情況就同美國對付華為相似咁話喎。