無論大家留唔留意藝術都好，相信唔少史友呢幾日都會發現位於法國嘅標誌性建築凱旋門就被完全「包」起嚟，原本壯麗嘅凱旋門消失晒。關於呢個舉動，並唔係因為有咩復修工程，而係凱旋門要化身成一件藝術品，到底當中有咩故事呢？阿史今次就同大家介紹下啦！

喺9月18日至10月3日呢段期間，凱旋門就化身成名為《包裹凱旋門》嘅藝術品，據了解呢個舉動係醖釀超過60年、斥資1400萬歐元，並且用上25000平方米織物，規模真係嚇死人。關於呢件作品，其實係已故著名大地藝術家克里斯托（Christo）同埋佢老婆珍妮・克勞德（Jeanne-Claude）設計嘅項目，關於呢件作品佢哋兩公婆早喺1961年就已經有過草圖設計出嚟。呢件作品亦都本應喺2020年亮相，但受到疫情影響而一再推遲，克里斯托老人家亦都喺舊年5月過身，無緣睇到呢件作品面世。

關於兩位老人家嘅願望，最後就由克里斯托嘅侄仔跟進，成件作品雖然係用咗好多錢整成，但原來過程中係唔接受公立機構或私人資助，而係通過出售草稿及各類作品得嚟。雖然作品面世之後，無論係巴黎當地人定係藝術家都各有睇法，甚至仲有人認為係浪費，之不過亦都有網友指出呢件作品嘅價值並唔係在於「出現」，而係在於呢個夢曾經實現過，唔知史友們又點睇呢？

原圖嚟自網絡