國家文物局從美國追索12件文物藝術品

以往阿史都同史友們講過，由於戰亂、政局動盪等因素，以往中國就有唔少珍貴嘅歷史文物被偷竊走私到其他國家。要知道要從海外重新追討返呢啲文物一啲都唔容易，但近日國家文物局就成功喺美國追索到12件文物藝術品。

據了解，早喺今年3月，國家文物局就得悉美國紐約曼哈頓區檢察官辦公室查獲到一批疑似係中國嘅文物藝術品，而經過專業人士鑒定之後，就判斷呢批文物係中國禁止出境文物，並且係冇得到任何出境申請。於是國家文物局就向美國提出追索要求，最終美方都同意歸還文物並且喺今年7月16日，12件文物藝術品安全運抵北京。

講咁耐，到底今次被偷走嘅文物有啲咩呢？呢批文物年代跨度主要為明清至民國時期，總體嚟講係西南地區典型器物就好似有5件金銅佛造像、1件銅鎏金水晶嵌寶石供養塔等等，當中就以1尊明末清初黃銅同侍從無量壽佛造像工藝最為精良。由於係西南地區嘅文物，今次國家文物局就決定支持西藏自治區文物保護利用工作，將批12件文物藝術品整體劃撥西藏博物館，文物將會喺西藏博物館新館開館展覽中集中展示，呢個真係一個好消息。