青海省都蘭縣熱水墓群嘅2018血渭一號墓近排就有最新嘅考古消息，早前一度被認為係「九層妖塔」據最新嘅考古調查發現，呢個墓主嘅真實身份可能係吐蕃統治下嘅吐谷渾王莫賀吐渾可汗。
所謂「九層妖塔」嘅講法其實就係網絡小說《鬼吹燈》改編而成電影《九層妖塔》入面嘅橋段，而呢座古墓喺2018年被盜掘嘅時候就因為同小說電影當中描述嘅場景相當相似，再加上墓葬真係足足有九層，甚至當地人都稱之為「妖魔洞」，於是就以「九層妖塔」之名轟動全國。
之不過，據中國社會科學院考古研究所、青海省文物考古研究所編寫《青海都蘭縣熱水墓群2018血渭一號墓》考古調查報告當中提到，吐蕃國王墓未必係「九層妖塔」。考古人員喺墓葬搵到唔少珍貴文物就好似1207件（組）金銀器，當中就有印章、容器、馬俱、帶飾等；而且仲有多件銅器、鐵器、漆木器、玉石等等。既然搵到咁多器物，咁到底又有冇證據證明到墓主身份呢？考古人員就經過遺物形制特徵並結合出土木材年輪，先係斷定到呢個古墓係公元8世紀中期吐蕃贊普赤德祖贊統治時期（公元704年至755年）嘅墓；然後再加上一件刻有雙峰駱駝嘅圖章同埋其他銀金合金印章，證明墓主好大機會係吐谷渾王。
雖然「九層妖塔」嘅講法難以成真，但墓入面嘅發現遠遠超越大家嘅想像，亦都為絲綢之路、中華文明提供唔少精彩嘅歷史證據。
原圖嚟自網絡