牛棚藝術村前身係牲畜檢疫站？

繼續同史友們介紹香港嘅特色古蹟，經過活化而保留落嚟嘅歷史建築大家都應該參觀唔少，有啲變成咗博物館、有啲就被餐廳租借咗，而今次阿史要介紹嘅呢個地方就係成個建築群都化身成藝術村嘅牛棚藝術村喇！

位於香港九龍馬頭角道63號嘅牛棚藝術村，現時就被用作發展藝術嘅用途，而呢個地方之所以叫做牛棚，係因為佢前身真係馬頭角牲畜檢疫站！呢個檢疫站以紅磚建成，整體嘅格局就同20世紀初嘅西方市場好相似。建築群中間仲有一個原本用嚟綁牛嘅空地，牛棚內亦都保留住餵牛飲食槽，槽底鐵鏈以及鐵環、磚砌煙囪等，真係充滿當時建築特色。

呢個檢疫站喺1908年建成，九十幾年間都被用作牛畜檢疫站兼屠房。時間去到1999年，當屠房搬咗去上水之後，政府就將呢個建築群批畀藝術工作者使用，並且取名為「牛棚藝術村」，設有二十個可出租單位，有唔少藝術文化機構都有定期喺呢度進行活動。