阿聯酋迪拜世博會 中國館「華夏之光」燈籠造型現身?

早前受到疫情影響而延後一年舉行嘅世博會終於喺阿聯酋迪拜開幕，今次嘅世博會有成192個國家參展，每個國家都會喺自己嘅展館展現科技嘅成果同埋文化嘅傳統，而我國嘅展館「華夏之光」亦都喺尋日正式開幕。

今屆世博會以「溝通思想，創造未來」為主題，而我國嘅展館就以「構建人類命運共同體——創新與機遇」作為主題，咁到底具體又係點樣呈現呢啲構念呢？阿史今次就同大家介紹下啦！其實就咁睇到展館嘅外型，相信唔少史友都留意到中國館係採用中國燈籠造型作為場館設計，喺主體建築嘅部分就用到斗栱、中式花窗格等中國傳統建築元素，同時亦都應用到現代建築嘅理念同埋科技，真係好有心思。

相信唔少史友心目中都有個疑問，就係點解要以燈籠作為中國館嘅主題，其實「燈籠」喺中國傳統文化當中有住唔少特別嘅意思，就好似象徵團圓、光明，寓意歡聚、溝通，而以傳統燈籠作為中國館外觀更係中國對世博會盛會嘅祝福：以溫暖之光，科技之光，人文之光照亮世界。