關於中國現代人嘅起源，演化嘅過程、生活嘅細節，歷來都係唔少考古團隊一直研究嘅議題，而近日河南省文物考古研究院就公布咗一項重大嘅發現！
喺位於魯山縣觀音寺鄉境內嘅仙人洞遺址，早喺2020年6月就已經有考古人員喺當地進行考古調查果陣發現人類化石、動物化石、石器等珍貴文物。經過國家文物局批准，考古團隊對呢個分有兩個洞嘅「仙人洞」遺址進行調查。目前，仙人洞遺址已發掘出人牙、頭骨斷塊以及動物碎骨1萬餘塊，當中動物碎骨就證實到有普氏原羚、普通馬、羊、棕熊、鹿、野豬、狼等，並且仲有石片、刮削器、斷塊等北方傳統石片工業製品，真係相當完整嘅一次發現。
之不過呢次發現嘅亮點唔止咁簡單，經過鈾系測年法測定，仙人洞遺址出土嘅其中兩件人頭骨斷塊最小年代分別為距今3.2萬、1.2萬年，頭骨斷塊正係為人額骨，厚度在現代人變異範圍之內，相關嘅人類化石證據相當罕少。換言之，呢次發現其實填補咗中原地區呢一個階段人類演化嘅空白，對中國現代人起源、演化研究有住極大意義。
原圖嚟自網絡