今時今日大家嘅日常生活都係離唔開茶餐廳，如果問起史友香港第一間茶餐廳係邊間，唔知又有冇史友答得出呢？
阿史喺度亦都唔賣關子，先同史友們開估先，其實香港第一間茶餐廳就係位於香港仔嘅「漁利泰」。「漁利泰」早喺1960年代就已經開業，咁點解會叫做「漁利泰」呢？原來呢個名係嚟自以前茶餐廳打理人安哥嘅家族漁船名，自從1960年當時衛生局新設茶餐廳牌照之後，安哥嘅家族就由漁船上岸，申請香港首個茶餐廳牌照。呢間餐廳最終選址香港仔東勝道，係全港第一間茶餐廳，有別於冰室，茶餐廳係可以提供更多種類嘅食品。
「漁利泰」係當時南區中高檔食肆，唔單止裝修靚、枱凳用全柚木製，入面甚至仲裝有冷氣，真係相當巴閉，所以當年成為唔少情侶聚腳地、甚至漁民都會嚟呢度相睇。全盛時期「漁利泰」有成30張枱，之不過去到80年代，由於其他茶餐廳出現，再加上聘請人手上嘅困難，漁利泰最終喺1988年初正式結業。

原圖嚟自網絡