最近大台套《無窮之路》大獲好評,唔少香港觀眾都話好耐無睇過一啲對內地風土人情講得咁深入嘅節目,又再一次認識祖國山河風情。其實香港電視台一直以來都播唔少介紹中國各地名山大川風土人情嘅節目,以往最出名就要數到《大江南北》。
《大江南北》係大台响上世紀七十年代末開始播出嘅節目,可以話係令唔少香港人認識祖國各地風土人情。有趣嘅係,最初呢個節目係大台派攝製隊到內地拍攝,第一個目的地就係廣東珠三角一帶,當時正值啱啱改革開放,所以觀眾們都覺得好新鮮。後嚟大台搵咗各省政府同旅遊局供片,再加入主持响錄景廠做講解,記得當年汪阿姐都做過主持。之後大台見咁節目受歡迎,於是就派攝製隊同藝員去內地各省各市拍攝,就咁呢個節目就做咗十幾年。
講到《大江南北》,史友們應該都會記得「拿啦啦喇拿啦喇」個段主題曲,原來呢段片頭音樂係取自日本NHK節目《你好!中國》,當年大台買咗播映權仲製作咗《萬里長江》呢個節目,而片頭音樂後嚟就沿用到《大江南北》喇!

原圖:tvb.com