《長津湖》呢部耗資13億元、中國史上最高投資嘅電影，以抗美援朝戰爭中「長津湖戰役」為背景，講述71年前中國人民志願軍第9兵團喺戰場與敵軍嘅決戰。呢部電影喺國慶節由預售開始已經大賣，單係國慶檔總票房就已經突破9億人民幣，真係相當犀利。電影嘅成功絕對離唔開真實嘅故事，=我方雖然喺呢場被稱為「世界軍事史上最為慘烈戰役」當中取得勝利，但就有無數嘅年輕戰士犧牲，留低落嚟見證到呢段慘痛歷史嘅，就只有周全弟。
周全弟係原中國人民志願軍26軍77師231團1營2連戰士，佢喺1950年10月25日隨部隊從遼寧丹東夜渡鴨綠江入朝，經歷大半個月行軍之後就抵達長白山脈南麓長津湖地區。當時佢同隊友冒著零下40度嘅嚴寒隱蔽進入黃草嶺軍事要衝，負責狙擊美軍王牌部隊海軍陸戰隊第一師與美第七師31團。
面對住百年一遇嘅極寒天氣，周全弟同戰友用辣椒水化雪禦寒充饑、三日三夜不眠不休喺雪地上進行潛伏阻擊任務，但可惜嘅係當行動正式執行、當衝鋒號吹響果陣。周全弟嘅手腳就已經毫無知覺，佢只能睇住周圍嘅戰友發起沖鋒，而自己就暈咗過去。
喺戰鬥結束之後，其他部隊返回埋伏地搜索，當時就搵到尚有氣息嘅周全弟，但佢雙手雙腿已經嚴重凍傷，被送到東北35陸軍醫院時已經需要完全截肢，而當時佢只係得17歲。面對突然其來嘅巨變，喺多年之後周全弟就表示唔後悔，但佢唯一遺憾就係「潛伏了三天三夜，沒有親手殺敵，沒有完成祖國交給的任務。」
原圖嚟自網絡